Leef luuj,

De meiste van uch zulle mich kinne as eine van De Roerdassen, maar dit jaor zal ich neet op ut podium truuk te vinje zeen as Roerdas. Dit jaor höb ich namelik de eer om as Prins Sonny II de Veldjmuus veur te gaon. Ich zal michzelf effe aan uch veursjtelle. Ich bön Sonny Mertens, 35 jaor aad en bön eigenaer van AI automatiseringsbedrief “Supreme Savvy”.

Al vanaaf det ich mich kin herinnere bön ich gek op de vastelaovend. Ut zit mich letterlik in ut blood. Zeker as se geis kieke nao wieväöl aad-veurgéngers mien familie haet veurtgebrach. Vreuger wiej ich nog klein waas meinde ich detse lid biej de vereniging mós zeen om prins te waere, maar toen ich d'r achter kwoom det det neet ut geval waas, begós de druim om ooit nog ins prins te waere te greuje. Woh? Allein biej de muus netuurlik. Miene opa kump van ut Veldj, zoot vreuger in de raod en ich vinj de Veldjmuus de sjoonste vastelaovesvereniging van Remunj.

Toen ich ein heel aantal jaore geleeje gevraog waerde om prins te waere, waas mien eerste reaksie dan ouch geliek ‘jao’, maar nao d'r effe good euver naogedach te höbbe, mós ich om versjillende raeje, mit pien in mien hért, toch nae zegke.

Vanaaf det moment is de wins om ooit nog ins prins te waere allein maar gegreujd. Ouch de vraog wanneer ich noew prins zou waere, waerde mich sjteeds vaker gesjteld. Toen ich veurig jaor Tonny taegekwoom, zei ich hem det ich jao zou zegke as se mich nog ins zoude vraoge. Hae zei det ze ut ginge euverligke. Ongertösse waas miene pap terminaal krank, maar ich zag mien pap waal “Volgend jaor waer ich prins. Let maar op.” Toen Tonny mich un tiedje later belde om weer op gesjprek te kómme, waas miene pap helaas al euverleeje en waas mien anjwaord dan ouch heel duudelik: “Jao netuurlik!” Miene druim waerde werkelikheid.

Helaas is miene pap der neet meer om ut same mit mich mit te make, maar ich weit zeker det hae ut super sjoon zou vinje en trots op mich is det ich noew dan eindelik prins bön. Same mit twee gooi kammeräöj van mich, Bas Schuman & Leon Beeren en miene naef, Maurice Leijendeckers, gaon veer volle bak gaas gaeve en make veer der dit jaor zeker ein topsezoen van ónger ut mótto, “Haol alles oet ut laeve!”

ZDH Prins Sonny II